USD
Шымкентте заңсыз онлайн-казинолардың айналымы 3,1 млрд теңгеге жеткен
Шымкент қаласында «Bingo-37» және «Lotoboom» онлайн-платформалары арқылы заңсыз құмар ойындар ұйымдастырылғаны анықталды. Қаржылық мониторинг агенттігінің мәліметінше, екі платформаның жалпы ақша айналымы 3,1 млрд теңгені құраған.
Тергеу деректеріне сәйкес, ойынға қатысуға шақырулар WhatsApp мессенджері арқылы таратылған. Құмар ойындарға қызығушылық танытқан азаматтарға арнайы аккаунттар ашылып, жүйеге кіруге арналған логин мен пароль берілген. Сонымен қатар оларға ақша аударуға қажетті банк шоттарының деректері жіберілген.
Заңсыз схеманы жүзеге асыру үшін ұйымдастырушылар 14 дропперді тартып, олардың банк шоттарын пайдаланған.
Агенттік мәліметінше, заңсыз ойын бизнесінен түскен қаражаттың есебінен 200 млн теңгеден астам сомаға мүлік сатып алынған. Олардың қатарында BYD Destroyer, LiXiang L6 Max, Chevrolet Monza және SsangYong Rexton маркалы автокөліктер, сондай-ақ екі жер учаскесі бар.
Сот шешімімен іс бойынша екі адам төрт жыл мерзімге бас бостандығынан айырылды. Олардың мүлкі мемлекет кірісіне тәркіленген.
Қаржылық мониторинг агенттігінің хабарлауынша, сот үкімі әзірге заңды күшіне енген жоқ.
