USD
Тоқаевтың Германиядағы ресми сапары Мюнхенде жалғасты
Қазақстан Президенті Қасым-Жомарт Тоқаевтың Германия Федеративтік Республикасына ресми сапары Мюнхенде жалғасып жатыр.
Ақорда мәліметінше, сапардың Мюнхендегі бағдарламасы аясында Мемлекет басшысы Бавария Үкіметі мен Ландтаг басшыларымен кездеседі. Сонымен қатар Президент өңірдің іскерлік ортасының өкілдерімен келіссөздер өткізеді.
Сапар барысында Қазақстан мен Бавария арасындағы экономикалық және технологиялық байланыстарды дамыту мәселелеріне де назар аударылмақ.
Сондай-ақ Қасым-Жомарт Тоқаевтың Қазақстан-Бавария технологиялық форумының ашылу рәсіміне қатысуы жоспарланған. Форум аясында екі тараптың технология, инновация және бизнес салаларындағы ынтымақтастығын кеңейту мүмкіндіктері талқыланады.
Мюнхендегі кездесулер Қазақстан мен Германия арасындағы, соның ішінде Бавариямен өңірлік деңгейдегі байланыстарды нығайтуға бағытталған сапар бағдарламасының бір бөлігі болмақ.
