USD
Тоқаев «Атлетико Мадрид» клубының бас директоры Мигель Анхель Хиль Маринді марапаттады
Қазақстан Президенті Қасым-Жомарт Тоқаев Испанияның әйгілі «Атлетико Мадрид» футбол клубының бас директоры Мигель Анхель Хиль Маринмен кездесті. Кездесу барысында тараптар Қазақстанда футболды дамыту, спорт инфрақұрылымын жетілдіру және жас ойыншыларды даярлау мәселелерін талқылады.
Ақорда мәліметінше, Мемлекет басшысы испаниялық клубпен орнатылған ынтымақтастықты жоғары бағалап, Хиль Мариннің Қазақстанға сапары өзара серіктестікті одан әрі нығайтуға жол ашатынын атап өтті.
Президенттің айтуынша, елімізде заманауи футбол инфрақұрылымын қалыптастыруға, жаттығу базаларын салуға және жас спортшыларды дайындауға басымдық беріліп отыр. Сонымен қатар Қазақстан футбол клубтарын жекешелендіру жұмыстары жалғасуда.
Қасым-Жомарт Тоқаев ФИФА-мен бірлесіп, еліміздің өңірлерінде балаларға арналған 100-ден астам жаңа футбол алаңын салу бастамасы қолға алынғанын да айтты.
Кездесу кезінде Мемлекет басшысы Испания құрамасы мен испаниялық футбол мектебінің тәжірибесіне тоқталып, оны қазақстандық жас футболшыларды тәрбиелеу барысында қолданудың маңызын жеткізді. Өз кезегінде Мигель Анхель Хиль Марин елімізде футболдың дамуына қолдау көрсетіп отырғаны үшін Президентке алғыс білдірді.
Сондай-ақ клуб басшысы Алматы облысында салынып жатқан «Атлетико Мадрид» академиясының инфрақұрылымымен танысып, жобаға оң бағасын берді. Оның пікірінше, академия болашақта футболшыларды даярлауға арналған үздік оқу-жаттығу орталықтарының біріне айналуы мүмкін.
Кездесу қорытындысында Қасым-Жомарт Тоқаев Мигель Анхель Хиль Маринді Қазақстанда футболды дамытуға қосқан үлесі үшін II дәрежелі «Достық» орденімен марапаттады.
