USD
Түркістан облысында Шымкент тұрғынынан 5 млн теңге бопсалады деген күдікпен 38 жастағы ер адам ұсталды. Алдын ала мәлімет бойынша, күдікті ақша бермеген жағдайда азамат туралы белгілі бір мәліметтерді жариялаймын деп қорқытқан.
Полицияның хабарлауынша, Сарыағаш ауданының тұрғынын Ұйымдасқан қылмысқа қарсы күрес басқармасының қызметкерлері жедел-іздестіру іс-шаралары барысында қолға түсірген.
Күдіктінің үйіне жүргізілген тінту кезінде ұялы телефон және 5 млн теңге тәркіленді.
Тергеу барысында ұсталған азаматтың бұған дейін де қылмыстық жауапкершілікке тартылғаны анықталды. Ол бұрын ұрлық және есірткі заттарын сақтауға байланысты қылмыстық істер бойынша жауапқа тартылған.
Қазіргі уақытта күдікті қамауда отыр. Бопсалау фактісі бойынша сотқа дейінгі тергеу жүргізілуде. Оның әрекетіне қатысты түпкілікті құқықтық баға тергеу нәтижесінде беріледі.
