USD
Жамбыл аудандық соты жүк көлігінің жүргізушісіне күш қолданған екі ағайындыға қатысты қылмыстық іс бойынша шешім шығарды.
Сот мәліметінше, оқиғаға қатысы бар екі азамат бір-біріне туған ағайынды. Олар 2026 жылдың мамыр айында Тараздағы «Зербұлақ» су ойын-сауық саябағынан Жамбыл ауданындағы тұрмыстық қалдықтар полигонына құрылыс қалдықтарын тасымалдаған.
Кезекті сапар барысында олар басқа жүк көлігінің жүргізушісімен жолдағы басымдық мәселесіне байланысты жанжалдасып қалған. Ауызша келіспеушілік кейін жанжалға ұласып, нәтижесінде жүргізуші дене жарақатын алған.
Сот отырысында айыпталушылардың кінәсі толық дәлелденді. Үкім шығару кезінде олардың кінәсін мойындауы, жасаған әрекетіне өкініш білдіруі және кәмелетке толмаған балаларының бар екені ескеріліп, жауапкершілікті жеңілдететін жағдайлар ретінде бағаланды.
Сот шешімімен ағайындылар Қазақстан Республикасы Қылмыстық кодексінің 109-1-бабы 2-бөлігінің 4-тармағы бойынша кінәлі деп танылды. Олардың әрқайсысына 100 сағат көлемінде қоғамдық жұмыстарға тарту жазасы тағайындалды.
Сот үкімі заңды күшіне енді.
