USD
Алматыда жылу беру маусымы 9 қазанда басталады
Алматыда биыл жылу беру маусымы ауа райының ерте суытуына байланысты белгіленген мерзімнен бұрын басталмақ. Қала әкімдігі орталық жылу жүйесіне қосу жұмыстарын 9 қазаннан бастауды жоспарлап отыр.
Әкімдік мәліметінше, алғашқы кезекте жылу әлеуметтік нысандарға жеткізіледі. Атап айтқанда, балабақшалар, мектептер және медициналық ұйымдар орталық жылу жүйесіне бірінші болып қосылады.
Тұрғын үйлерге жылу беру 10 қазаннан басталады деп жоспарланған. Үйлер жылу жүйесіне қосылғаннан кейін ПИК және МИБ мамандары ішкі инженерлік жүйелерді ретке келтіреді. Мамандар радиаторлар мен тік құбырлардағы ауаны шығарып, жүйедегі қысымды реттейді. Бұл пәтерлердің біркелкі жылынуын қамтамасыз етуге мүмкіндік береді.
Қала әкімдігінің хабарлауынша, «Алматы жылу жүйесі» ЖШС қысқы маусымға дайындық жұмыстарын толық аяқтаған. Сонымен қатар ықтимал ақауларды жедел жою үшін қажетті қосалқы материалдар мен құрал-жабдықтардың қоры жасақталған.
2026–2027 жылдардағы жылу беру кезеңінде қала бойынша 16 апаттық және жөндеу бригадасы тәулік бойы жұмыс істейді. Олардың құрамында 220 маман бар, ал бригадалар 56 арнайы техникамен қамтамасыз етілген.
Әкімдік тұрғындарға жылу қосылғаннан кейін үй ішіндегі жүйелерді реттеу жұмыстары белгілі бір уақыт алуы мүмкін екенін ескертті.
