USD
БАӘ-ден үш халықаралық іздеудегі күдікті Қазақстанға жеткізілді
Қазақстанда қылмыс жасап, кейін елден бой тасалаған үш азамат Біріккен Араб Әмірліктерінен Қазақстанға экстрадицияланды. Олардың барлығы бұған дейін халықаралық іздеуге жарияланған.
Бас прокуратураның мәліметінше, күдіктілердің бірі 2019–2020 жылдары сыбайласымен бірге Астанада халықаралық орталық салуға арналған жер телімін алуға көмектесуге уәде берген. Алайда бұл сылтаумен жәбірленушіден 368 мың АҚШ долларын иемденіп кеткен деген күдік бар.
Екінші азамат Алматыда жасалған ауыр қылмыс бойынша іздеуде болған. Тергеу нұсқасына сәйкес, 2021 жылы ол бірнеше адаммен бірге тұрғынға шабуыл жасап, денсаулығына ауыр зиян келтірген. Сонымен қатар жәбірленушінің құны 100 мың теңгеден асатын мүлкін ашық түрде тартып алған.
Үшінші күдіктіге биыл жазда Астанада Қытай азаматына тиесілі 24,2 мың АҚШ долларын ұрлады деген күдік келтіріліп отыр. Құқық қорғау органдары бұл соманы аса ірі мөлшерге жатқызады.
Тергеу мәліметіне сәйкес, үш азамат та қылмыс жасалғаннан кейін Қазақстаннан шығып, қылмыстық қудалау органдарынан жасырынған. Осыдан кейін олар халықаралық іздеуге берілген.
Кейін олардың Біріккен Араб Әмірліктерінде жүргені анықталған. Қазақстан Бас прокуратурасының сұрауы негізінде БАӘ тарапы күдіктілерді елге қайтарды.
Қазір үшеуі де тергеу изоляторына қамалды. Оларға қатысты сотқа дейінгі тергеу қайта жалғасып жатыр.
