USD
2040 жылға қарай Каспий арқылы жүк тасымалы төрт есеге артуы мүмкін
Қазақстан Президенті Қасым-Жомарт Тоқаев Орталық Азия және Әзербайжан мемлекеттері басшыларының консультативтік кездесуінде аймақтағы көлік-логистика және су ресурстары мәселелеріне тоқталды.
Мемлекет басшысының айтуынша, Дүниежүзілік банктің бағалауынша, жоспарланған инфрақұрылымдық жобалар толық жүзеге асқан жағдайда 2040 жылға қарай Каспий теңізі арқылы өтетін жүк ағыны төрт есеге дейін ұлғаюы ықтимал.
Тоқаев бұл ретте Орта дәліздің көлік саласындағы TRIPP бастамасымен ықтимал ықпалдастығын сарапшылар деңгейінде талқылауды ұсынды. Президенттің пікірінше, мұндай қадам қолданыстағы көлік бағыттарының әлеуетін кеңейтіп, өңір елдерінің ұзақ мерзімді мүдделеріне сай келуі мүмкін.
Су ресурстары – өңірдегі негізгі мәселелердің бірі
Қасым-Жомарт Тоқаев сөзінде трансшекаралық су ресурстарын басқару мәселесіне де ерекше мән берді. Президент су тапшылығы мен су ресурстарын тиімді пайдалану Орталық Азиядағы тұрақтылыққа әсер ететін маңызды факторлардың бірі екенін атап өтті.
Мемлекет басшысы өңір елдері арасында трансшекаралық суларды басқарудың жаңа тәсілдерін қалыптастыру қажеттігін айтты. Оның пікірінше, бұл үдеріс өзара құрмет, тең құқықтылық және барлық мемлекеттердің мүддесін ескеру қағидаттарына негізделуі керек.
Осы бағыттағы өңірлік ынтымақтастықтың жаңа архитектурасын қалыптастыру үшін Орталық Азияның су пайдалану жөніндегі негіздемелік конвенциясын қабылдау маңызды қадам болуы мүмкін. Президенттің айтуынша, аталған құжат жобасы қазір барлық тараптың қарауында.
Сонымен қатар Тоқаев Біріккен Ұлттар Ұйымының қамқорлығымен Халықаралық су ұйымын құру бастамасын өзекті деп атады. Оның пікірінше, бұл ұсыныс халықаралық деңгейде, соның ішінде Орталық Азия елдерінің ортақ бастамасы ретінде ілгерілетілуі мүмкін.
Мемлекет басшысы аталған бағыттағы бірлескен жұмысты жаһандық су ресурстарын басқару жүйесін дамытуға қосылатын ортақ үлес ретінде бағалады.
