USD
Тоқаев өңір қауіпсіздігіне төнетін негізгі қатерлерді атады
Қазақстан Президенті Қасым-Жомарт Тоқаев Түрікменстанда өткен Орталық Азия мемлекеттері және Әзербайжан басшыларының 8-консультативтік кездесуінде аймақтағы қауіпсіздік мәселелеріне тоқталды.
Мемлекет басшысы әлемдегі геосаяси тұрақсыздық күшейген кезеңде Орталық Азиядағы бейбітшілік пен тұрақтылықты сақтау аса маңызды міндет екенін атап өтті.
Президенттің айтуынша, терроризм, есірткі бизнесі, қару-жарақ пен адам саудасы, заңсыз көші-қон, ұйымдасқан қылмыс және алаяқтық өңір қауіпсіздігіне әлі де елеулі қатер төндіріп отыр.
Сонымен қатар Тоқаев цифрлық технологиялардың қылмыстық топтардың, соның ішінде террористер мен есірткі картельдерінің қолына түсу қаупіне алаңдаушылық білдірді. Осыған байланысты қауіп-қатерлерге қарсы күрес тәсілдерін заман талабына сай жаңарту қажеттігін айтты.
Мемлекет басшысы қауіпсіздік саласындағы ынтымақтастықты нығайтуға Орталық Азия елдері қауіпсіздік хатшыларының тұрақты кездесулері маңызды үлес қосып келе жатқанын атап өтті. Үшінші кездесу биыл 23-24 сәуірде Душанбеде өткен.
Тоқаев өткен жылы Ташкентте қабылданған Өңірлік қауіпсіздік пен тұрақтылық тұжырымдамасын және қауіпсіздік тәуекелдері мен олардың алдын алу шаралары каталогын жоғары бағалады. Президент аталған құжаттарды толық әрі жүйелі түрде іске асыру қажеттігін айтты.
Мәдени-гуманитарлық байланыстарды күшейту ұсынылды
Сөз барысында Қасым-Жомарт Тоқаев Орталық Азия елдері арасындағы мәдени және гуманитарлық ынтымақтастықты дамытуға да ерекше назар аударды.
Президенттің пікірінше, аймақ мемлекеттерін ортақ тарихи және мәдени мұра біріктіреді. Соңғы жылдары елдер арасындағы мәдени байланыстар жанданып, түрлі көрмелер, кинофестивальдер, форумдар және тарихи-мәдени шаралар ұйымдастырылып келеді.
Мемлекет басшысы бұл бағыттағы жұмыстарға қосымша серпін беру үшін жастар алмасуын кеңейтуді, жоғары оқу орындары мен ғылыми орталықтар арасындағы байланысты күшейтуді және шығармашылық зиялы қауым өкілдерінің диалогын дамытуды ұсынды.
Тоқаев өңірлік ынтымақтастықтың маңызды бағыты ретінде ортақ ақпараттық кеңістік қалыптастыру мәселесін де көтерді.
Осыған байланысты Қазақстан Президенті қазақстандық Silk Way телеарнасы негізінде өңірлік телеканал құру туралы бастаманы тағы да ұсынды. Оның пікірінше, мұндай жоба Орталық Азия елдері арасындағы ақпараттық және мәдени байланысты одан әрі нығайтуға мүмкіндік береді.
