USD
Қазан айының алғашқы демалыс күндері Қазақстанның бірқатар өңірінде ауа райы күрт өзгереді. Синоптиктердің мәліметінше, ел аумағына Солтүстік циклонның енуіне байланысты температура төмендеп, жауын-шашын күшейеді.
Алдағы күндері ауа райы құбылмалы болады. Қазақстанның басым бөлігінде жаңбыр жауып, кей өңірлерде жаңбыр қарға ұласады. Солтүстік облыстарда түнгі уақытта қар жаууы мүмкін. Сонымен қатар көктайғақ пен бұрқасын күтіледі.
Оңтүстік және шығыс аймақтарда негізінен жаңбыр жауады. Батыс пен солтүстіктің кей жерлерінде түнде және таңертең тұман түседі. Елдің көп бөлігінде желдің жылдамдығы артады.
Температура да айтарлықтай төмендейді. Қазақстанның солтүстік жартысында түнгі ауа температурасы -1…-6 градусқа дейін түседі. Күндіз солтүстік-батыс, солтүстік және орталық өңірлерде ауа температурасы 0…+5 градус шамасында болады.
Шығыс облыстарда күндіз +7…+12 градусқа дейін жылынса, оңтүстік және оңтүстік-шығыс өңірлерде +10…+15 градус аралығында сақталады. Таулы аймақтарда ауа температурасы 0…+5 градус шамасында болады.
Ал Қазақстанның батысында салыстырмалы түрде жылы ауа райы сақталады. Бұл өңірлерде күндіз ауа температурасы +10…+18 градусқа дейін көтеріледі.
Синоптиктер тұрғындарға ауа райының күрт өзгеруіне байланысты жолдағы жағдайға назар аударып, әсіресе солтүстік өңірлерде көктайғақ пен бұрқасын кезінде сақтық шараларын сақтауға кеңес береді.
