USD
Өзбекстанның энергожүйесінде болған апат салдарынан Қазақстанда бірқатар тұтынушының электр энергиясын пайдалануына уақытша шектеу қойылды. Шектеудің жалпы көлемі 962 МВт болды.
KEGOC мәліметінше, 25 қыркүйекте сағат 05:02-де Өзбекстан энергожүйесінде 1516 МВт генерацияның апатты жағдайда ажыратылуы тіркелген. Соның әсерінен Орталық Азия энергожүйесі тарапынан қуат ағыны пайда болып, Қазақстандағы Солтүстік–Оңтүстік транзиті бөлінген.
Осыған байланысты Қазақстанның энергожүйесінде апатқа қарсы автоматика іске қосылып, тұтынушыларға 962 МВт көлемінде уақытша шектеу енгізілді. Автоматика штаттық режимде жұмыс істеген.
Сағат 05:43-те Қазақстанның Біртұтас электр энергетикалық жүйесінің оңтүстік аймағы мен Орталық Азия энергожүйесінің параллель жұмыс режимі қайта қалпына келтірілді. Осыдан кейін тұтынушыларға қойылған шектеулерді алып тастау туралы команда берілген.
Өзбекстан Энергетика министрлігінің хабарлауынша, елдің энергожүйесінде жалпы 1600 МВт қуат апатты жағдайда ажыратылған. Оқиға Сырдария облысындағы EDF компаниясына тиесілі жаңа жылу электр станциясында болған.
