USD
Каспий теңізіндегі әскери оқу-жаттығу кезінде сарбаздардың қаза болуына қатысты тергеу жүріп жатыр. Оқиғаға байланысты әскери қызметшілердің қауіпсіздігін қамтамасыз ету және оқу-жаттығуды ұйымдастыру талаптарын бұзуы мүмкін деген күдікке ілінген лауазымды тұлғалар анықталған.
Бұл туралы Үкіметтік комиссияның отырысында Ішкі істер министрінің орынбасары Санжар Әділов мәлімдеді. Оның айтуынша, аталған фактілер бойынша Қылмыстық кодекстің 453-бабының 2-бөлігі және 465-бабы бойынша қылмыстық істер қозғалған.
Тергеу барысында әскери қызметшілердің қауіпсіздігіне, оқу-жаттығуларды өткізуге және құтқару жұмыстарына қатысты заң талаптарының сақталуы тексеріліп жатыр. Күдікке ілінген тұлғалардың әрекетіне тергеу нәтижесінде құқықтық баға беріледі.
Оқиға кезінде құтқарылған әскери қызметшінің де жағдайы бақылауда. Денсаулық сақтау вице-министрі Манас Рамазанов оның жағдайы тұрақты екенін және өміріне қауіп жоқ екенін хабарлады. Қазір әскери қызметші барлық қажетті медициналық көмекті алып жатыр, жанында ата-анасы бар.
Үкіметтік комиссия отырысында қаза тапқан және зардап шеккен әскери қызметшілердің отбасыларына қажетті қолдау көрсету тапсырылды. Сонымен қатар оларға көрсетілетін материалдық көмекті ашық бөлу мәселесіне ерекше назар аударылды.
Көмек мемлекеттік төлемдер мен өтемақыларды ғана емес, кәсіпкерлер мен меценаттар тарапынан көрсетілетін қаржылық қолдауды да қамтиды. Барлық жиналған қаражаттың бөлінуі ашық жүргізілетіні айтылды.
