USD
Павлодар облысында әлеуметтік желіден танысқан ер адаммен жанжалдасқан әйел далада адасып кеткен
Қостанай қаласының тұрғыны әлеуметтік желі арқылы танысқан ер адаммен бірге тұру үшін Павлодар облысына барған. Алайда екеуінің арасында тұрмыстық жанжал туындап, әйел үйден кетіп қалған. Кейін ол далада адасып, өздігінен кері қайтуға жол таба алмаған.
Оқиға қыркүйек айының бір күнінде болған. Ер адаммен сөзге келіп қалған әйел ренішпен үйден шығып кеткенімен, жолда бағытынан жаңылып, Павлодар облысының кең даласында адасып қалған. Ақырында оған көмек қажет болған.
Қазіргі уақытта әйел Қостанай қаласына жеткізіліп, анасына тапсырылған.
Осы оқиға кезінде көмек көрсеткен Павлодар облысының полицейлеріне алғыс білдірілді. Қостанай облысындағы гемофилиямен ауыратын және мүгедектігі бар адамдардың «Тұмар» қауымдастығының жетекшісі Лейла Балғабаева тәртіп сақшыларының әрекетіне ризашылығын білдіріп, арнайы алғыс хат жолдаған.
Құқық қорғау органдары өкілдерінің айтуынша, қиын жағдайға тап болған азаматтарға қолдау көрсету – полиция қызметінің маңызды бағыттарының бірі.
«Әрбір алғыс – атқарылған жұмыстың жоғары бағасы әрі полицейлерге үлкен ынта береді. Біз тұрғындардың қауіпсіздігін қамтамасыз етіп, полицияға деген сенімін нығайту үшін алдағы уақытта да бар күшімізді саламыз», – деп атап өтті тәртіп сақшылары.
