USD
Қазақстанда бір аптада пияз, қант және алма бағасы төмендеді
Қазақстанда әлеуметтік маңызы бар азық-түлік өнімдерінің бірқатары арзандады. 7 қазан 2026 жылғы мәлімет бойынша, соңғы аптада ең көп арзандаған өнім – пияз. Сонымен қатар қант, алма, картоп және басқа да тауарлардың бағасы төмендеген.
Апталық мониторинг нәтижесіне сәйкес, пияздың құны 4%-ға, қант 2,6%-ға, алма 1,8%-ға, ал картоп 1%-ға арзандаған. Сәбіздің бағасы 0,8%-ға, балық 0,3%-ға төмендеді. Қаймақ, ет фаршы және күріштің бағасы 0,2%-дан кеміген.
Ал ұн, нан, сүйексіз сиыр еті, қой еті және тауық етінің құны өзгеріссіз қалған.
Өңірлер бойынша әлеуметтік маңызы бар азық-түлік бағасының жалпы төмендеуі Атырауда 0,3%, Түркістан мен Ақтауда 0,1% деңгейінде тіркелді. Астана, Алматы, Ақтөбе, Жезқазған, Қонаев, Павлодар, Талдықорған және Тараз қалаларында өткен аптамен салыстырғанда баға өзгермеген.
Ел бойынша пияздың орташа бағасы келісіне 133 теңгені құрады. Ең төмен баға Талдықорғанда тіркеліп, бір келісі 108 теңгеден сатылған.
Қанттың орташа құны 435 теңге болса, Ақтөбеде оның бағасы 368 теңгеге дейін төмендеген. Алманың орташа бағасы келісіне 699 теңгені құрады. Шымкентте бұл жемісті 494 теңгеден сатып алуға болады.
Қиярдың республика бойынша орташа бағасы келісіне 536 теңгеге жетті. Ең арзан қияр Түркістанда сатылып, бір келісі 346 теңгені құрады. Таразда қиярдың бағасы 414 теңге болған.
Әлеуметтік маңызы бар азық-түлік тауарларының бағасы елімізде апта сайын бақылауға алынады. Мониторинг негізгі азық-түлік өнімдерінің құнындағы өзгерістерді анықтауға мүмкіндік береді.
