USD
Қаракемердегі үш оқушының өлімі: «Система» бейресми тобының әрекеті әшкереленді
Жамбыл облысының Қордай ауданындағы Қаракемер ауылында үш кәмелетке толмаған баланың қазасына қатысты қылмыстық іс тергеліп, сотқа жолданды. Арнайы прокурорлардың мәліметінше, оқушылар арасындағы бопсалау фактілері мен балалардың өлімі арасында өзара байланыс анықталған.
Тергеу барысында ауыл мектептерінің оқушылары арасында «Система» деп аталатын бейресми топтың болғаны белгілі болды. Оның мүшелері арасында өзіндік иерархия, бағыну тәртібі және жазалау қағидалары қалыптасқан. Прокуратура дерегінше, топ өкілдері мектеп оқушыларынан ақша талап етіп, оларға қысым көрсеткен.
Бас прокуратура жиналған айғақтар бопсалау әрекеттері мен үш жасөспірімнің қазасы арасында себеп-салдарлық байланыстың бар екенін көрсететінін хабарлады.
Қылмыстық іс аясында екі күдікті ұсталды. Оларға кәмелетке толмағандарды қорқыту және өз-өзіне қол жұмсауға дейін жеткізу фактілері бойынша айып тағылған.
Бұдан бөлек, тағы бес адамның әрекеті Қылмыстық кодекстің 194-бабы 2-бөлігі бойынша сараланған. Оларға қатысты өзге де бұлтартпау шаралары қабылданған.
Прокуратураның мәліметінше, Қаракемер ауылындағы «Система» деп аталған бейресми құрылымның қызметі тоқтатылды. Қылмыстық іс соттың қарауына жіберілді.
