USD
1 желтоқсаннан бастап Қазақстандағы электр көліктерін қуаттау станцияларының жұмысына жаңа талаптар енгізіледі. Енді станцияларда электр энергиясының көлемін есептейтін өлшеу құралдары тұрақты түрде тексеріліп, міндетті метрологиялық бақылаудан өтеді.
ҚР Сауда және интеграция министрлігінің мәліметінше, электр көлігін қуаттау кезінде жүргізілетін өлшемдер мемлекеттік реттеу саласына енгізіледі. Осыған байланысты зарядтау станцияларында қолданылатын есептеу құралдары белгіленген тәртіппен міндетті түрде салыстырып тексерілуі тиіс. Бұл талап министрдің 2026 жылғы 25 қыркүйектегі №272-НҚ бұйрығымен бекітілген.
Жаңа тәртіптің негізгі мақсаты – тұтынушының нақты алған электр энергиясы көлеміне сәйкес төлем жасауын қамтамасыз ету. Себебі зарядтау қызметінің құны тікелей өлшеу құрылғысының көрсеткішіне байланысты.
Метрологиялық тексеріс барысында жабдықтың техникалық жағдайы мен электр энергиясының көлемін қаншалықты дәл есептейтіні анықталады. Сондықтан зарядтау станцияларының операторлары есептеу құралдарының жарамдылығын бақылап, оларды белгіленген мерзімде тексеруге жіберуі қажет.
Тұтынушылар үшін бұл өзгеріс есеп айырысу кезіндегі ықтимал қателерден қосымша қорғаныс береді. Сондай-ақ электр көлігін қуаттау кезінде көрсетілген көлем мен төлем сомасының дұрыстығына деген сенімді арттыруға мүмкіндік береді.
Қазақстанда электр көліктерінің саны мен қуаттау инфрақұрылымы біртіндеп артып келе жатқандықтан, жаңа талаптардың енгізілуі өзекті болып отыр. Министрлік бірыңғай ережелер операторлар мен тұтынушылар арасындағы есеп айырысуды нақты әрі ашық етуге ықпал ететінін атап өтті.
