USD
Сеулде құрылыс алаңында болған жазатайым оқиға салдарынан Қазақстан азаматы қаза тапты. Ер адамның үстіне бетон төбенің бір бөлігі құлап, ауыр жарақат алған ол оқиға орнында көз жұмған.
Оңтүстік Кореяның Yonhap агенттігінің хабарлауынша, қайғылы жағдай 29 қыркүйекте Сеулдің оңтүстігіндегі Сочхо ауданында салынып жатқан тұрғын үй кешенінде болған. 30 жас шамасындағы қазақстандық 23-қабаттағы пәтерде тазалық жұмыстарының басталуын күтіп тұрған. Сағат шамамен 09:45-те оның үстіне бетон төбенің бір бөлігі опырылып түскен.
Оқиғадан кейін Оңтүстік Кореяның Еңбек және жұмыспен қамту министрлігі құрылыс нысанындағы жұмыстарды уақытша тоқтатып, полиция және құрылыс қауіпсіздігіне жауапты органдармен бірлесіп тергеу жұмыстарын бастады. Құзырлы органдар оқиғаның себептерін анықтап, нысанда еңбек қауіпсіздігі талаптарының сақталуын тексермек.
Қазақстанның Сыртқы істер министрлігі де Сеулдегі құрылыс алаңында Қазақстан азаматының қаза тапқанын растады.
Ведомство мәліметінше, Оңтүстік Кореяның тиісті органдары оқиға бойынша тергеу жүргізіп жатыр. Қазақстандық дипломаттар марқұмның туыстарымен байланыс орнатып, оларға консулдық және құқықтық көмек көрсетуде.
