USD
Шымкентте мейрамханада жұмыс істеген 13 жастағы жасөспірім көз жұмды
Шымкентте банкет залдарының бірінде жұмыс істеп жүрген 13 жастағы жасөспірімнің өліміне қатысты полиция тергеу жүргізді. Қайғылы жағдай бірнеше ай бұрын болған.
Қалалық полиция департаментінің мәліметінше, сотқа дейінгі тергеу барысында баланың өліміне жүрек қызметінің тоқтауы себеп болғаны анықталған. Құқық қорғау органдары оқиғаға байланысты тиісті тексеру жұмыстарын жүргізген.
Тексеру кезінде кәмелетке толмаған жасөспірімді жұмысқа тарту кезінде еңбек заңнамасының талаптары бұзылғаны анықталды. Осыған байланысты банкет залының иесі әкімшілік жауапкершілікке тартылған.
Қазақстан заңнамасына сәйкес, 14 жасқа толмаған балалармен еңбек шартын жасауға жол берілмейді. Ал 14 жастан бастап жасөспірімдер ата-анасының келісімімен оқу процесіне зиян келтірмейтін жеңіл жұмыстарды атқара алады.
Полиция жасөспірімнің өліміне қатысты тергеу нәтижесінде қылмыстық сипаттағы өзге мән-жайлар анықталмағанын хабарлады.
