USD
Қазақстанда маусымдық тұмауға қарсы вакцина салу науқаны басталды. Халықты тегін иммундау үшін 2,1 млн доза вакцина сатып алынған. Оның алғашқы 564 мың дозасы елге жеткізіліп, өңірлерге кезең-кезеңімен таратылып жатыр.
Қазіргі таңда вакцина Алматы, Түркістан және Жетісу облыстарына, сондай-ақ Алматы мен Шымкент қалаларына жөнелтілген. Қалған өңірлерге препараттарды жеткізу 5 қазанға дейін аяқталады деп жоспарланған.
Вакцина қолына тиген медициналық ұйымдар тұрғындарға екпе салуды бастап кетті.
Денсаулық сақтау министрлігінің мәліметінше, биыл тегін вакцинация үшін Ресейде өндірілген «Гриппол» препараты қолданылып отыр. Оның құрамындағы тұмау штамдары алдағы эпидемиологиялық маусымға арналған Дүниежүзілік денсаулық сақтау ұйымының ұсынымдарына сәйкес келеді.
Тегін екпе ең алдымен тұмауға және оның асқынуына бейім азаматтарға салынады. Бұл санатқа медицина қызметкерлері, диспансерлік есепте тұрған балалар, жетім және ата-анасының қамқорлығынсыз қалған балалар, медициналық-әлеуметтік мекемелердің қызметкерлері мен сол жердегі қамқорлықтағы адамдар жатады. Сонымен қатар эпидемиологиялық көрсеткіштер бойынша инфекция жұқтыру қаупі жоғары азаматтар да вакцина ала алады.
Министрлік өкілдері вакцинация үшін қазан айы қолайлы кезең екенін атап өтті. Бұл уақытта екпе алып, тұмаудың маусымдық өршуіне дейін ағзада иммундық қорғанысты қалыптастыруға мүмкіндік бар.
